தேசிய விளையாட்டு தினம்

Review Score0

2016-10-07_15-46-16

 

  • எண்ணற்ற தினங்களை கொண்டாடி வரும் நம்மில் பலருக்கு இன்று (ஆகஸ்ட் 29), இந்தியாவின் விளையாட்டு தினம் என்பது வியப்பு தருவதாக இருக்கலாம். ஹாக்கி விளையாட்டு சாதனையாளர் தயான் சந்த் நினைவாக அவரின் பிறந்த தினத்தில் தேசிய விளையாட்டு தினம் இந்தியாவில் கொண்டாடப்படுகிறது.

 

  • யார் இந்த தயான் சந்த்? தன் நெஞ்சிலும், உதிரத்திலும் இந்தியாவையும், ஹாக்கி விளையாட்டையும் மட்டுமே சுமந்த ஒப்பற்ற ஹாக்கி வீரர் தயான் சந்த். ஹிட்லர் மன்றாடி கேட்டுக் கொண்ட போதிலும் இந்தியாவிற்கு மட்டும் தான் விளையாடுவேன் என்று நெஞ்சை நிமிர்த்திய தாய்நாட்டு பற்றாளர் தயான் சந்த். 1928, 1932, 1936 ஆகிய ஒலிம்பிக் போட்டிகளில் இந்தியா தங்கப் பதக்கம் வெல்ல முக்கிய காரணமாக இருந்தார்.

 

  • இன்று நம் நாட்டில் விளையாட்டை, விளையாட்டு வீரர்களை (கிரிக்கெட் வீரர்களை தவிர்த்து) எந்தளவு அங்கீகரிக்கிறோம். நம் குழந்தைகளின் கனவு சர்வதேச விளையாட்டு வீரனாக, வீராங்கனையாவதா?

 

  • சிறு வயதிலிருந்து ‘படி படி, படிப்பு மட்டும் தான் சோறு போடும்’ என்று சொல்லிக் கொடுத்து குழந்தைகளை வளர்த்த சமூகம் நம்முடையது. ‘ஓடி விளையாடு பாப்பா’ என்று குழந்தைகளை உற்சாகப்படுத்தினார் பைந்தமிழ் கவிஞர் பாரதி. ஓடாமல், ஏன் அசையாமல் கூட வீடியோ கேம் மட்டும் நம் குழந்தைகள் விளையாடுகின்றன.

 

  • விளையாட்டிற்காக தன் இளமையை, வாழ்க்கையை அர்ப்பணிக்கும் வீரர்களால் விளையாட்டை தவிர வேறெதையும் சிந்திக்க முடியாது. காலை 4 மணிக்கே கூட பயிற்சி தொடங்கிவிடும். பயிற்சி முடிந்து பள்ளிக்கு செல்ல வேண்டும். பின், மீண்டும் மாலையில் பயிற்சி. அவ்வப்போது பயிற்சிக்காகவும், ஆட்டங்களுக்காகவும் வெளியூர் பயணங்கள்; கிடைத்த இடத்தில் சாப்பாடு மற்றும் படுக்கை. மீண்டும், மீண்டும் பயிற்சி, விளையாட்டு தான்.

 

  • இவ்வளவு தியாகங்களை செய்தாலும் தன் மாநில, தேசிய அணிக்காக தேர்வு செய்யப்படுவது ஒரு விளையாட்டு வீரனின் கையில் இல்லை. எண்ணற்ற போட்டியாளர்கள், உள்ளூர் அரசியல், போதிய விளையாட்டு பயிற்சி வசதி இன்மை, சர்வதேச தரத்தில் இல்லாத ஆடுகளங்கள் என பல தடைகளை தாண்டியே இந்தியாவின் ஒவ்வொரு வீரனும், வீராங்கனையும் சாதிக்கின்றனர்.

 

  • தனிநபர் விளையாடும் விளையாட்டுகளில் ஆட முயலும் வீரர்களின் வலி சொல்லி மாளாது. நவீன வசதிகள் ஏன் நல்ல காலணிகள் கூட வாங்க வழியில்லாமல் இந்தியாவின் செர்ஜி புப்காக்கள், ரோஜர் ஃபெடரர்கள், ஸ்டெப்பி ஃகிராப்கள், உசேன் போல்ட்கள் தங்களின் திறமை என்னவென்று தெரியாமல், பிழைப்புக்காக ஏதோ ஒரு பணிக்கு செல்கின்றனர். தொலைக்காட்சியில் மட்டும் விளையாட்டை கண்டு வலியுடன் வாழ்கின்றனர்.

 

  • ஆனாலும், தற்போதைய காலகட்டம் நம்பிக்கை தருவதாக உள்ளது. கிரிக்கெட் விளையாட்டை தவிர்த்து சாய்னா, யோகேஷ்வர், சிந்து, மேரி கோம், விகாஸ் கவுடா, சானியா என்று பல நட்சத்திர விளையாட்டு வீரர்கள் உலக அரங்கில் ஜொலிக்கின்றனர். இந்த பட்டியல் வரும் ஆண்டுகளில் மேலும் உயரலாம்.

 

  • தன் ஜெர்ஸியில் ‘இந்தியா’ என்ற பெயருடன் களத்தில் நம் நாட்டை நெஞ்சில் சுமந்து ஆடும் எண்ணற்ற வீரர்கள் மற்றும் தற்போது கனவுகளுடன் பயிற்சியில் ஈடுபட்டிருக்கும் எதிர்கால வீரர்கள் அனைவருக்கும் வாழ்த்து கூறி, தேசிய விளையாட்டு தினத்தை நாமும் கொண்டாடுவோம்.

 

LATESTS GOVERNMENT JOBS